චිත්ත බලය 2.5 - භාවනාවේ ගැටලු සහ පිළිතුරු

විවිධ ආලෝක/මන්ඩලා පෙනීම

අපි ඇස් වසාගෙන සිටින විට ඇසේ සංවේදීතාවය වැඩි වෙනවා. එවිට ඉතා සුළු විකිරණ, ආලෝක කිරණ හෝ අපගේ ශරීරයේම විද්යුත්-රසායනික ප්‍රතික්‍රියා සහ රුධිර සංසරණය පවා ඇසට සංවේදනය වෙනවා. මේවා ආලෝක මන්ඩලා විදියට සංජානනය වෙන්න පුළුවන්. මේවා ගැන ඕනෑවට වඩා හිතන්න එපා. ඒ සංවේදනය හඹායන්නත් එපා. ඒක සාමාන්‍ය දෙයක් කරගන්න.

නළල මැද (හෝ ශරීරයේ යම් තැනක) වෙදනාවක්, තෙරපීමක් දැනීම

සිත ඒකාග්‍ර කිරීමට වෙහෙස දැරීමෙන් හෝ ඇස් වසාගෙන නාභිගත කිරීමට නොදැනුවත්වම උත්සාහ කිරීමෙන් මෙසේ විය හැකියි. අපේ දෙනෙත් ස්වභාවිකවම එක් වස්තුවක් මත නාභිගත වීමට උත්සාහ කරනවා. ඒත් ඇස් වසාගත් විට ඇස් දෙකට හසුවන දේ තනි වස්තුවක් විදියට සංජානනය කරගන්න බෑ.

මුලින් ඇස් අඩවන් ව විවෘත කර බලන්න. වේදනාව පහව යයි නම් ඇස් ඉහිල් කරන්න - ඉන් පසු අවශ්‍යනම් ඇස් වසාගත හැකියි.

ශරීරයේ යම් තැනක හෝ නැවත වේදනාවක්, තෙරපීමක් දැනේ නම් එම සංවේදනය ගැන සිහිය යොමු කරන්න. ඉන්පසු එම ස්ථානය අරමුණු කර - නහයෙන් ගැඹුරු හුස්මක් (බඩ පිම්බෙන ලෙස) ගන්න. මද වෙලාවක් හුස්ම රඳවාගෙන සිට - කටෙන් හුස්ම සෙමෙන් පිට කරන්න. මෙසේ තුන් වතාවක් පමණ කරන්න.

භාවනාව ආරම්භ කිරීමේදී නළල මැද සුළු තෙරපීමක් දැනී ටික වෙලාවකින් එය මගහැරී යාම සාමාන්‍යයි.

කකුල් හිරිවැටීම

පහසු සහ සෘජු ඉරියව්වකින් සිටින්න. රුධිර සංසරණය අඩාල වූ විට හිරිවැටෙන්න පුළුවන්. ඉඳගෙන සිටින ඉරියව්වෙන් නම් - පසුපසට කොට්ටයක් තබා වාඩි වෙන්න. බංකුවක් හෝ පුටුවක් වුවත් කමක් නෑ. ශාරීරික වේදනාවන් භාවනාවට බාදාවක් විය යුතු නෑ. ශරීරයට පීඩා ගෙනදීමෙන් පමණක් කිසිම විමුක්තියක් ලැබෙන්නේ නෑ. හීම් යකඩ සහ විටමින් B (Neuro B Complex - B1, B6, and B12) ආහාරයට එක් කරගන්න.

කකුල් වල කූඹි හෝ ඉඳිකටු අනිනවා මෙන් දැනීම

මෙය හිරිවැටීමට වඩා වෙනස් සංවේදනයක්. ඒ ගැන අවධානය යොමු කරන විට එම සංවේදනය එක් එක් තැනක සිට පිටතට විහිදී යන බවක් දැනේ. ඉන් පසු එය අඩු වී නැති වී යයි. මේ ගැන කලබල විය යුතු නෑ. ව්‍යායාම කිරීමෙන් පසු ශරීරයට විවේකයක් ලැබෙන විට මෙය සිදු විය හැක. යෝගා සහ දිගැදුම් (stretching) කරන්න. ප්‍රෝටීන්, යකඩ සහ විටමින් B අඩංගු ආහාර ගන්න. හොඳින් ජලය පානය කරන්න - අවශ්‍ය ලෙස electrolytes මිශ්‍ර ජලය.

Disclaimer

ශාරීරික සහ මානසික සෞඛ්‍ය සම්බන්ධයෙන් වෛද්‍ය උපදෙස් වලට ප්‍රමුඛතාවය දෙන්න. විශේෂයෙන්ම භාවනාවෙන් පරිභාහිරවද ඇති වන සංකූලතා වලට වෛද්‍ය සහය පතන්න.

Question Received: ඔබ සිංහල අවුරුදු නැකත් අනුගමනය කරනවද?

ලංකාවට බුදු දහම පැමිනීමට පෙර සිංහලයින් ගස් ගල් වන්දනා කල පිරිසක් ලෙස තමයි අපිට බොහෝ විට අහන්න ලැබෙන්නේ. නමුත් එමගින් අදහස් වනවාද සිංහලයින් සියලුදෙනාම පුරාණ පේගන් ආගමිකයින් ව සිටි පිරිසක් බව.. ඒ කාලයේදී ගස් ගල් අදහන ගෝත්‍රික/පේගන් පුරාණාගමිකයින් මෙන්ම හින්දු, ජෛන ආදී උතුරු ඉන්දියානු ආගම් සහ ශෛව වැනි දකුණු ඉන්දියානු ආගම් ද ලංකාවේ තිබුන බවට සාක්ශි තිබෙනවා.

ලෝකයේ ආගම් බිහි වුනේ එක් එක් යුග වල ඒ කාල වල මනුශ්‍යයාට තිබුන අවශ්‍යතා අනුව. ගල් යුගය සහ ලෝකඩ යුගය මේවායෙන් මුල් යුගයයි. ඒ කාලයේ මිනිසුන් පර්වත, ගස් ආදී සොබා දහමේ මූලික බලවේග දේවත්වයෙන් සැලකුවා. ඊලඟට එඬේර සහ මුල් ගොවි යුගයේ මිනිසාට ඊට වඩා සංකීර්ණ අවශ්යතා ඇති වීමත් සමඟ, ගොවිතැනට බලපාන සෘතු වෙනස් වීම සතුන්ගේ සහ තම වර්ගයාගේ සරු බව සහ භෝග සම්පත්තිය උදෙසා දේවත්වයන් වන්දනා කලා.

වර්තමාන යුගයේ අපට සෘතු වෙනස් විම එතරම් වැදගත් දෙයක් ලෙස සලකන අවශ්‍ය නොවන්නේ සුපිරි වෙලඳසැලෙන් භාන්ඩ මිලදී ගෙන වායුසමීකරනය කරගත් ගොඩනැගිලි වල ජීවත් වන නිසා විය හැකි, නමුත් මනුශ්‍යයන් වශයෙන් අප සැම දෙනා වගා කරන ලද ආහාර මත යැපෙන හෙයින් සෘතු වෙනස් වීමට යටත් වන ජීවීන් පිරිසක්.

සිංහල අලුත් අවුරුද්ද මෙන්ම අළුත් සහල් මංගල්‍යයත් සොබා දහමේ සෘතු වෙනස් වීම සැමරීමේ අවස්ථාවන්. අපගේ ජීවිතයට ඉතා වැදගත් වන, ලෝකයේ සියලු ජීවයට ශක්තිය සපයන, අපට දිවා කල ආලෝකය ලබා දෙන සූර්යයාට ස්තූතිවන්ත වීම තමයි මේ සූර්‍ය සංවත්සර වල අරමුණ විය යුත්තේ.

අළුත් සහල් මංගල්‍යය සහ අළුත් අවුරුද්ද මෙන්ම තවත් සූර්‍ය සංවත්සර හයක් (සම්පූර්ණ වශයෙන් අටක්) තිබෙනවා සූර්‍යයා වටා පෘථිවිය ගමන් කිරීම නිසා ලෝකයේ ඇති වන සෘතු වෙනස් වීම් සැමරීමට. මේවා සියල්ල හෝ බොහෝමයක් තවමත් උත්සවාකාරයෙන් සමරන බොහෝ ජන කොටස් ලෝකය පුරා සිටිනවා, චීනය ජපානය වැනි පෙරදිග රටවල් වල මෙන්ම එංගලන්තය ස්කොට්ලන්තය වැනි බටහිර රටවල පවා. ඒවායේ අර්ථය වන්නේ සෘතු වෙනස් වීමත් සමඟ මිනිසා ඊට හැඩගැසිය යුතු ආකාරය මතක් කර දීමටත් සොබා දහමෙන් මිනිසා ලද ජීවයට ස්තූති-උපහාර කිරීමටත්. මීට සාපේක්‍ශව ගල් යුගය සහ ලෝකඩ යුගයේ සොබාදහම ඇදහීම් වල දකින්න ලැබෙන ලක්ශණයක් තමයි වසන්තය ආරම්භය සහ ශීත කාලය ආරම්භය සැමරීම.

සිංහල සහ හින්දූන් පමනක් නොව, ක්‍රිස්තියානි සහ කතෝලිකයින් සමරන පාස්කුවේ (Ēostre) පුරාණ අර්ථය වන්නේත් වසන්ත කාලය ආරම්භ වීමයි.

තුන් වන යුගයේ ආගම් පැතිරුනේ මිනිසුන් නාගරීකරණය විමත් සමඟයි. බූදු දහම තවමත් උදා නොවුන පස් වන යුගයට වඩාත් ගැලපෙන දහමක් වුවත් එයද ලංකාවට ප්‍රචාරය වූ යුගය ලෝකයේ අනෙක් තුන් වන යුගයේ ආගම් බිහි වූ මුල් යුගයයි. එම නිසා ධර්මය ප්‍රචාරය වීම සහ ජනතාව අතරට එකතු වීම අතින් සමාන්තර ලක්ශන දකින්න පුලුවන්. දෙවන යුගයේ පැවතුන ආගමික චාරිත්‍ර සමඟ මිශ්‍ර වීම නිසා තමයි අපට අපේ සංස්කෘතිය තුල අළුත් සහල් මංගල්‍යය වැනි බුදු දහම සමඟ බැඳුන පුරාණාගමික චාරිත්‍ර, බුදු දහම සහ බැඳුන දහඅටසන්නිය වැනි පුරාණාගමික අභිචාර විධි දකින්න ලැබෙන්නේ, එමෙන්ම පාස්කුව වැනි පේගන් මූලයක් ඇති ක්‍රිස්තියානි උත්සව ඇති වුනේත් එකම යාන්ත්‍රනයක් හරහායි.